Latest News

സത്യപ്രതിജ്ഞ ചടങ്ങിന് നിന്നില്ല, വിവാഹിതയാകാന്‍ എംപി തുര്‍ക്കിയിലേക്ക് പറന്നു, വിവാഹവും കഴിഞ്ഞു

2019-06-21 01:54:55am |

ന്യൂഡല്‍ഹി: നടിയും ബംഗാളില്‍ നിന്നുള്ള ലോക്‌സഭ എംപിയുമായ നുസ്രത് ജഹാന്‍ വിവാഹിതയായി. വ്യവസായി നിഖില്‍ ജയിനാണ് വരന്‍. ബുധനാഴ്ച തുര്‍ക്കിയിലെ ബോഡ്രം നഗരത്തില്‍ വെച്ചായിരുന്നു വിവഹം. എം.പി.യുടെ അടുത്ത ബന്ധുക്കളും സുഹൃത്തുക്കളും മാത്രമാണ് വിവാഹചടങ്ങില്‍ പങ്കെടുത്തത്.

തൃണമൂല്‍ കോണ്‍ഗ്രസ് സ്ഥാനാര്‍ത്ഥിയായിരുന്ന നുസ്രത് ബംഗാളിലെ ബസീര്‍ഹട്ട് മണ്ഡലത്തില്‍ നിന്നാണ് ജയിച്ചത്. 17-ാം ലോക്സഭയുടെ ആദ്യ സമ്മേളന കാലയളവിലായിരുന്നു എം.പി.യുടെ വിവാഹം. ഇതിനെത്തുടര്‍ന്ന് കഴിഞ്ഞദിവസം നടന്ന എം.പി.മാരുടെ സത്യപ്രതിജ്ഞ ചടങ്ങിലും നുസ്രത്ത് എത്തിയില്ല. നുസ്രത്ത് ജഹാന്റെ വിവാഹത്തില്‍ പങ്കെടുക്കാന്‍ പോയതിനാല്‍ മറ്റൊരു തൃണമൂല്‍ എം.പി.യായ മിമി ചക്രവര്‍ത്തിയും സത്യപ്രതിജ്ഞ ചെയ്യാനെത്തിയില്ല.

ഏതാനുംദിവസങ്ങള്‍ക്കുള്ളില്‍ ഇന്ത്യയിലേക്ക് തിരിച്ചെത്തുന്ന നവദമ്പതികള്‍ ജൂലായ് നാലിന് കൊല്‍ക്കത്തയില്‍ വിവാഹസല്‍ക്കാരം ഒരുക്കിയിട്ടുണ്ട്. പ്രമുഖ ചലച്ചിത്രതാരങ്ങളും രാഷ്ട്രീയനേതാക്കളും വിവാഹസല്‍ക്കാരത്തില്‍ പങ്കെടുക്കുമെന്നാണ് വിവരം.