Latest News

വനിതാ ജയിലിൽനിന്ന്​ തടവുചാടിയ യുവതികളെ പിടികൂടി; രക്ഷപ്പെട്ടത് വനിതാ ജയിലിലെ​ മുരിങ്ങമരത്തിലൂടെ പുറത്ത്​ ചാടി

2019-06-28 01:22:09am |

തിരുവനന്തപുരം: അട്ടക്കുളങ്ങര വനിതാ ജയിലിൽനിന്ന്​ തടവുചാടിയ യുവതികളെ പൊലീസ് പിടികൂടി. വർക്കല തച്ചോട് സജിവിലാസത്തിൽ സന്ധ്യ (26), പാങ്ങോട് വെള്ളയം പുത്തൻവീട്ടിൽ ശിൽപമോൾ (23) എന്നിവരെ വ്യാഴാഴ്​ച രാത്രി 11.30ഓടെ പാലോട് അടപ്പുപാറ ഭാഗത്തുനിന്നാണ്​ പിടികൂടിയത്. ഇരുവരെയും പുലർച്ചയോടെ ഫോർട്ട് പൊലീസ് സ്​റ്റേഷനിൽ എത്തിച്ചു. ഇന്ന് കോടതിയിൽ ഹാജരാക്കും.  

കഴിഞ്ഞ ചൊവ്വാഴ്ചയാണ് വനിതാ ജയിലിലെ​ മുരിങ്ങമരത്തിലൂടെ പുറത്ത്​ ചാടി ഇരുവരും രക്ഷപ്പെട്ടത്. തുടർന്ന്​ മെഡിക്കൽ കോളജ്​ ഭാഗത്തെത്തിയ  ഇരുവരും ഭിക്ഷയാചിച്ച് കിട്ടിയ പണവുമായി വർക്കലയിലേക്ക് പോകുകയായിരുന്നു. അവിടെനിന്ന് ബസിൽ അയിരൂരിലും തുടർന്ന്​ പരവൂരിലും എത്തി.  പൊലീസ് പിന്തുടരുന്നെന്ന് മനസ്സിലാക്കി പാങ്ങോടുള്ള ശിൽപയുടെ ബന്ധുവീട്ടിലേക്ക് വരുന്നതിനിടയിലാണ്​ ഫോർട്ട് എ.സി പ്രതാപചന്ദ്രൻ നായരുടെ നേതൃത്വത്തിലുള്ള പ്രത്യേക സംഘം ഇരുവരെയും പിടികൂടിയത്​. കഴിഞ്ഞദിവസം പ്രതികളുടെ ബന്ധുക്കളെ ചോദ്യം ചെയ്തതിൽ നിന്ന് ഇവർ വീടുകളിലേക്ക് സഹായത്തിനായി എത്തുമെന്ന സൂചന പൊലീസിന് ലഭിച്ചിരുന്നു. പാരിപ്പള്ളിയിൽ ​െവച്ച് ശിൽപ ബന്ധുക്കളുമായി ഫോണിൽ ബന്ധപ്പെടുകയും ചെയ്​യ​ു. ഇതാണ് പൊലീസിന്​ പിടിവള്ളിയായത്. 

അതേസമയം, തടവുപുള്ളികൾ രക്ഷപ്പെട്ട സംഭവത്തിൽ ജയിൽ ജീവനക്കാർക്കെതിരെയുള്ള നടപടി വരുംദിവസങ്ങളിൽ തീരുമാനിക്കും. പ്രാഥമികാന്വേഷണത്തിൽതന്നെ ജീവനക്കാരുടെ അനാസ്ഥ വ്യക്തമായിരുന്നതായി ഉദ്യോഗസ്ഥർ പറയുന്നു. രണ്ടു തടവുപുള്ളികൾ ജയിൽചാടിയിട്ടും അത് ഉറപ്പിക്കാൻ ജീവനക്കാർക്ക് മണിക്കൂറുകൾ വേണ്ടിവന്നതുതന്നെ നിരുത്തരവാദിത്തത്തിന് തെളിവാണെന്ന്​ ഉന്നത ഉദ്യോഗസ്ഥർ ചൂണ്ടിക്കാട്ടുന്നു.