Latest News

വിവാഹിതരായ പുരുഷന്‍മാരെയും പൗരോഹത്യത്തിനായി പരിഗണിക്കാം; വിപ്ലവകരമായ തീരുമാനവുമായി പോപ്പ് ഫ്രാന്‍സിസ്

2017-03-11 03:49:13am |

ലോകത്തിന്റെ ഒറ്റപ്പെട്ട പ്രദേശങ്ങളില്‍ കത്തോലിക്ക സഭയുടെ ആരാധനാലയങ്ങള്‍ വൈദികരുടെ കുറവ് നേരിടുന്നതിനാല്‍ വിവാഹതരായ പുരുഷന്‍മാരെയും പൗരോഹത്യത്തിനായി പരിഗണിക്കാമെന്ന് പോപ്പ് ഫ്രാന്‍സിസ്. ജര്‍മ്മനിയിലെ ഡൈ സെയ്റ്റ് മാഗസിന് നല്‍കിയ അഭിമുഖത്തിലാണ് സഭ വളരെ ഗൗരവകരമായി വിവാഹിതനെ പുരോഹിതനാക്കുന്ന കാര്യം പരിഗണിക്കുന്നതായി വ്യക്തമാക്കിയത്. വിരി പ്രോബറ്റി നിര്‍ദേശം എന്നാണ് ഈ നീക്കം അറിയപ്പെടുന്നത്.

10,000 കത്തോലിക്കര്‍ക്ക് വെറും ഒരു വൈദികന്‍ മാത്രമേയുള്ളൂ എന്ന സ്ഥിതിയാണ് ആമസോണില്‍. വിവാഹിതരെ വൈദികന്മാരാക്കുന്ന നിര്‍ദേശങ്ങളെ തുറന്ന മനസോടെയും ഉദാരതയോടെയുമാണ് പോപ്പ് സ്വീകരിക്കുന്നത്.വൈദീകരുടെ ബ്രഹ്മചര്യത്തെ കുറിച്ചതും വിപ്ലവകരമായ തീരുമാനം ഉണ്ടാവുമെന്നാണ് അറിയുന്നത്.

ബ്രഹ്മചര്യം സഭയ്ക്ക് മുകളില്‍ ഒരു നിയമമായി അടിച്ചേല്‍പ്പിക്കരുതെന്നും മറിച്ച് ഒരു അച്ചടക്ക വഴിയായി മാത്രം നടപ്പിലാക്കണമെന്നുമാണ് പോപ്പ് സൂചിപ്പിക്കുന്നത്. ബ്രഹ്മചര്യവുമായി ബന്ധപ്പെട്ട നിയമത്തില്‍ സഭ ചില ഇളവുകള്‍ നടത്തുന്നതിന്റെ ഭാഗമായി ഈസ്റ്റേണ്‍ റൈറ്റ് കത്തോലിക്കാ ചര്‍ച്ചിലെ പുരോഹിതന്മാരെ വിവാഹം കഴിക്കാന്‍ അനുവദിക്കുന്നുണ്ട്. വൈദികരുടെ എണ്ണം വര്‍ധിക്കുന്നത് വഴി ലോകമെമ്പാടും മതത്തിന്റെ പ്രചരണം കൂടുതല്‍ ശക്തമാക്കുവാന്‍ സാധിക്കുമെന്നാണ് അദ്ദേഹം കരുതുന്നത്. ഈ വര്‍ഷം ഇന്ത്യ സന്ദര്‍ശിക്കാന്‍ പദ്ധതിയുണ്ടെന്നും പോപ്പ് ഇന്റര്‍വ്യൂവില്‍ പറയുന്നുണ്ട്.