Latest News

തീവ്രവാദി ആക്രമണങ്ങള്‍ വര്‍ധിക്കുമ്പോള്‍ യൂറോപ്പില്‍ മുസ്ലിം വിരുദ്ധത കരുത്താര്‍ജിക്കുന്നോ? ബുര്‍ഖ നിരോധിക്കാന്‍ ഡെന്‍മാര്‍ക്കും

2017-10-07 03:14:52am |

കോപ്പൻ​ഹേഗൻ: മുസ് ലിം സ്​ത്രീകൾ ധരിക്കുന്ന മുഖാവരണം (ബുർഖ, നിഖാബ്) നിരോധിക്കുന്നതിനുള്ള നടപടികളുമായി യൂറോപ്യൻ രാജ്യമായ ഡെൻമാർക്കും.​ ഡെൻമാർക്ക് പാർലമെന്‍റിലെ ഭൂരിഭാഗം പാർട്ടികളും നിരോധനത്തെ പിന്തുണച്ചതോടെയാണ് സർക്കാർ നിരോധനം ഏർപ്പെടുത്താൻ ഒരുങ്ങുന്നത്. കണ്ണ് മാത്രം പുറത്തു കാണുന്ന രീതിയിൽ ധരിക്കുന്ന മുഖാവരണത്തിനും കണ്ണി​ന്‍റെ സ്ഥാനത്ത്​ നേർത്ത തുണികൊണ്ടുള്ള​ പൂർണമായി മറക്കുന്ന മുഖാവരണത്തിനുമാണ് നിരോധനം ഏർപ്പെടുത്തുക​. 

ഡെൻമാർക്ക് കൂട്ടുമന്ത്രിസഭയി​ലെ ഭൂരിപക്ഷവും നിരോധന തീരുമാനത്തെ പിന്തുണച്ചു. സർക്കാറി​ന്‍റെ സഖ്യകക്ഷിയായ ഡാനിഷ്​ പീപ്പ്ൾ പാർട്ടിയും മുഖ്യ പ്രതിപക്ഷമായ സോഷ്യൽ ഡെമോക്രാറ്റുകളും നിരോധന​ത്തോട്​ അനുകൂല നിലപാടാണ്​ സ്വീകരിച്ചത്​. മുഖാവരണം നിരോധിക്കാനുള്ള തീരുമാനം ഫലപ്രദമാണെന്നും ഇത് മതപരമായ പ്രശ്നമല്ലെന്നും മുഖം മറക്കുന്നതിന്‍റെ നിരോധനമാണെന്നും ലിബറൽ പാർട്ടി വക്​താവ്​ ജേക്കബ്​ എലെമാൻ ചൂണ്ടിക്കാട്ടി. 

പൂർണമായും ഭാഗികമായും മുഖാവരണം ധരിക്കുന്നത് സംബന്ധിച്ച്​ യൂറോപ്യൻ രാജ്യങ്ങളിലെ ജനങ്ങൾക്കിടയിൽ വ്യത്യസ്​ത അഭിപ്രായമാണുള്ളത്​. മുഖാവരണം ധരിക്കുന്നത്​ മതപരമായ സ്വാതന്ത്ര്യമാണെന്ന്​ ഒരു വിഭാഗം വാദിക്കുന്നു. എന്നാൽ, അന്യദേശ​ സംസ്​കാരവും സ്​ത്രീകളോടുള്ള മർദനത്തി​ന്‍റെ പ്രതീകവും ആണെന്ന് മറ്റൊരു വിഭാഗം ആരോപിക്കുന്നു. 

ഡെൻമാർക്കിൽ ഏകദേശം 200ഒാളം മുസ് ലിം സ്​ത്രീകൾ മുഖാവരണം ധരിക്കുന്നതായി വിവിധ പഠനങ്ങൾ വ്യക്ത​മാക്കുന്നു. ഫ്രാൻസ്, ബെൽജിയം, നെതർലാൻഡ്​സ്​, ബൾഗേറിയ, ബവേറിയ എന്നീ രാജ്യങ്ങളിൽ പൊതുസ്ഥലങ്ങളിൽ പൂർണമോ ഭാഗികമോ ആയി മുഖാവരണങ്ങൾ ധരിക്കുന്നതിന്​ നിയന്ത്രണങ്ങൾ ഏർപ്പെടുത്തിയിട്ടുണ്ട്​​. 

നോർവെ സർക്കാർ കിൻറർഗാർഡൻ, വിദ്യാലയങ്ങൾ, സർവകലാശാലകൾ എന്നിവിടങ്ങളിൽ മുസ് ലിംകൾ മുഖാവരണം ധരിക്കുന്നത്​ നിരോധിക്കാൻ കഴിഞ്ഞ ജൂണിൽ തീരുമാനിച്ചിരുന്നു.