Latest News

2019 മാര്‍ച്ച് 29 രാത്രി പതിനൊന്നു മണി! യൂറോപ്യന്‍ യൂണിയന്‍ വിടാനുള്ള ശുഭമുഹൂര്‍ത്തം കുറിച്ച് തെരേസാ മേയ്‌

2017-11-12 03:53:18am |

ലണ്ടൻ: യൂറോപ്യൻ യൂണിയൻ വിടാനുള്ള സമയം പ്രഖ്യാപിച്ച് ബ്രിട്ടീഷ് പ്രധാനമന്ത്രി തെരേസ മേയ്. പ്രമുഖ ബ്രിട്ടീഷ് ദിനപത്രത്തിലെഴുതിയ ലേഖനത്തിലൂടെയാണ് 2019 മാര്‍ച്ച് 29 രാത്രി പതിനൊന്നു മണിയ്ക്ക് യൂറോപ്യൻ യൂണിയൻ വിടുമെന്ന് തെരേസ മെയ് പ്രഖ്യാപിച്ചത്. ഈ സമയത്തിനകം എല്ലാ ചര്‍ച്ചകളും നടപടിക്രമങ്ങളും പൂര്‍ത്തിയാക്കി രാജ്യം യൂറോപ്യൻ യൂണിയന് പുറത്തു കടക്കുമെന്ന് തെരേസ മെയ് പ്രഖ്യാപിച്ചു.

ബ്രെക്സിറ്റ് സംബന്ധിച്ച ബിൽ അടുത്തയാഴ്ച പാര്‍ലമെന്‍റ് പരിഗണിക്കാനിരിക്കെയാണ് സര്‍ക്കാര്‍ നിലപാട് വ്യക്തമാക്കി തെരേസ മെയ് രംഗത്തു വന്നിരിക്കുന്നത്. ബ്രെക്സിറ്റിനെതിരെ എന്തെല്ലാം നീക്കങ്ങളുണ്ടായാലും അതു സാധ്യമാക്കുമെന്ന് തെരേസ മെയ് ലേഖനത്തിലെഴുതി. ബിൽ ഗുണപരമാക്കാനുള്ള നിര്‍ദ്ദേശങ്ങള്‍ ആര്‍ക്കും മുന്നോട്ടു വെയ്ക്കാമെന്നും എന്നാൽ ബ്രെക്സിറ്റ് തടസ്സപ്പെടുത്തുന്നതിനോട് യോജിപ്പില്ലെന്നും മേയ് പറഞ്ഞു. നേതാക്കള്‍ ഒരുമിച്ചു നിന്ന് ബ്രെക്സിറ്റിനായി പ്രയത്നിക്കണമെന്നാണ് ജനങ്ങള്‍ ആഗ്രഹിക്കുന്നതെന്നും പ്രധാനമന്ത്രി പറഞ്ഞു.

കഴിഞ്ഞ ദിവസം നടന്ന ബ്രെക്സിറ്റ് ആറാം റൗണ്ട് ചര്‍ച്ചയിലും കാര്യമായ പുരോഗതിയുണ്ടായില്ല. നഷ്ടപരിഹാരത്തുക ഉള്‍പ്പെടെയുള്ള കാര്യങ്ങള്‍ തീരുമാനിക്കാൻ ബ്രിട്ടനു കൂടുതൽ സമയം നൽകുമെന്ന് യൂറോപ്യൻ യൂണിയൻ ചീപ് നെഗോഷ്യേറ്റര്‍ മിഷേൽ ഗാര്‍ണിയര്‍ പറഞ്ഞു.