Latest News

ആസ്ട്രേലിയൻ പൗരത്വം, പിതാവ് നാസയിൽ ഗവേഷകൻ; ഫേസ്ബുക്ക് വഴി തട്ടിപ്പ്​ നടത്തിയ യുവാവ് പിടിയിൽ

2019-01-08 02:48:52am |

ഫേസ്ബുക്ക് വഴി യുവതിക്ക്​ വിവാഹവാഗ്ദാനം നൽകി പണവും ആഭരണങ്ങളും കവർന്നയാളെ ചാലക്കുടി പൊലീസ്​ അറസ്​റ്റ് ചെയ്തു. ആസ്ട്രേലിയൻ പൗരത്വമുള്ളവനെന്ന് വിശ്വസിപ്പിച്ച് വിദേശത്ത്​ ജോലി ചെയ്യുന്ന യുവതിയിൽ നിന്നും പണം തട്ടിയ കൊരട്ടി  ചെട്ടിക്കുന്ന് കോളനി കൊല്ലേരി പ്രതീഷ് (25)നെയാണ്​ അറസ്​റ്റ് ചാലക്കുടി പൊലീസ്​ അറസ്​റ്റ്​ ചെയ്​തത്​. 

പിതാവ് നാസയിൽ ഗവേഷകനാണെന്നും സഹോദരിമാർ കനേഡിയൻ പൗരത്വമുള്ളവരാണെന്നും അമ്മ മാത്രമാണ് കേരളത്തിലുള്ളൂവെന്നും ധരിപ്പിച്ച്​ യുവതിയുടെ ഫേസ് ബുക്ക്, വാട്സാപ്പ് വിവരങ്ങൾ വാങ്ങി അതിലേക്ക്​ ത​​​െൻറതാണെന്ന്​ പറഞ്ഞ്​  മറ്റൊരാളുടെ ഫോട്ടോ നൽകി  പ്രജീഷ് യുവതിയെ തെറ്റിദ്ധരിപ്പിച്ചു. പിതാവെന്നും സഹോദരിമാരെന്നും പറഞ്ഞ് ഓൺലൈനിൽ നിന്ന്​ ഡൗൺലോഡ് ചെയ്ത മദ്ധ്യവയസ്ക​​​െൻറയും യുവതികളുടെ ഫോട്ടോകളും നൽകി. 

ഇംഗ്ലീഷ്,കന്നട, തമിഴ്, ഹിന്ദി  നന്നായി സംസാരിക്കുന്ന ഇയാൾ ബിസിനസിനെന്ന്​ പറഞ്ഞ് യുവതിയോട് രണ്ട് തവണയായി എട്ട്​ ലക്ഷം രൂപ വാങ്ങി. മാസങ്ങൾ കഴിഞ്ഞിട്ടും പ്രതീഷ് വിളിക്കാതായതോടെ അങ്കമാലിയിൽ എത്തിയ പെൺകുട്ടിയുടെ വീട്ടുകാർക്ക് കൊടുത്ത വിലാസത്തിൽ ആരെയും കണ്ടെത്താൻ കഴിഞ്ഞില്ല. പ്രതീഷിനെ വിളിച്ചപ്പോൾ അവിടെ പുതിയ വീട്ടുകാരായ തങ്ങളെ എല്ലാവരും വിദേശത്തായതിനാൽ ആരുമറിയില്ലെന്ന്​ മറുപടി കിട്ടി.  പെൺകുട്ടിയുടെ വീട്ടുകാർക്ക് സംശയമായി. ഈ വിവരം അറിയിച്ചപ്പോൾ പെൺകുട്ടി പ്രതീഷെന്നു പറഞ്ഞ് തനിക്ക് നൽകിയ ഫോട്ടോകൾ വീട്ടുകാർക്ക് അയച്ചുകൊടുത്തതോടെയാണ്​ തട്ടിപ്പ്​ പുറത്തായത്​. തുടർന്ന് പെൺകുട്ടിയുടെ വീട്ടുകാർ പരാതി നൽകി. 

പ്രതീഷിനെ അന്വേഷിച്ച് അങ്കമാലി വട്ടപ്പറമ്പിലെത്തിയ പൊലീസ് സംഘത്തിന് ഇയാളുടെ കുടുംബം സ്ഥലം വിറ്റ് പോയതായി വിവരം കിട്ടി. തുടർന്നാണ് മാമ്പ്രയിലെ കോളനിയിൽ പ്രതീഷി​​​െൻറ കുടുംബം താമസിക്കുന്നത്​ കണ്ടെത്തിയത്. പ്രതീഷി​​​െൻറ ഫോൺ നമ്പർ സംഘടിപ്പിച്ച് വാടകയ്ക്ക് കാർ വേണമെന്ന ആവശ്യവുമായി സമീപിച്ചതനുസരിച്ച് ചെങ്ങമനാട് എത്തിയപ്പോഴാണ്​ പിടികൂടിയത്​. 

ചോദ്യം ചെയ്യലിൽ താൻ വിവാഹിതനാണെന്നും മൂന്ന്​ കുട്ടികളുടെ പിതാവാണെന്നും ഇയ്യാൾ സമ്മതിച്ചു. ആ യുവതിയേയും തെറ്റിദ്ധരിപ്പിച്ചാണ് വിവാഹം കഴിച്ചത്. സത്യാവസ്ഥ മനസ്സിലായപ്പോൾ അവർ ബന്ധം വേർപെടുത്തി. ഇയാൾ പലരെയും  വലയിലാക്കിയതായി പൊലീസ്​ കണ്ടെത്തി. വിനോദ സഞ്ചാര കേന്ദ്രമായ കോവളത്ത്​െവച്ച് ഒരു യുവതിയെ പീഡിപ്പിച്ച കേസ് നിലവിലുള്ളതിനാൽ പ്രതീഷിനെ കോവളം പൊലീസിന് കൈമാറി.